« الدين لله والمليطة للجميع | HomePage | بتحلم بأيه ؟ »

21/05/2005

من طوبة لدبشة يا قلبي لا تحزن


يوم 25 مايو الحالي هو يوم تاريخي لنا كمصريين بكل المقاييس
عشان الشعب المصري هـ يتمكن – لأول مرة – من تحديد مصيره
وده بالاستفتاء على تعديل المادة 76 من الدستور أو كما تشير استمارة الاستفتاء
هل أنت مع تعديل المادة 76 من الدستور
نعم / لا
وبعد ما عرفنا أيه هي التعديلات اللي أتعدلت في المادة ؛ بقينا زي اللي بيختار يموت بالسم ولا رمياً بالرصاص
نقول لأ نبقى بندافع عن نظام الاستفتاء على مرشح واحد
ولو نقول نعم نبقى موافقين على شروط ترشيح مستحيل يقدر عليها مرشح إلا من الحزب الوطني
.. يعني بنختار بين مبارك ولا مبارك برضه
أوعى تفتكر أنهم نفس الشخص لأ دول أتنين بس من نفس السلالة
الكبير فيهم حب يورث الصغير عرش مصر ، لكن لما حس أن الناس ممكن تقلع ملط وتجري في الشوارع
وأن ماما أمريكا مش هـ تسمح بتكرار النموذج السوري قرر يورث له دستور يمنع ترشيح أي شخص غيره
وبكده يوصل السيد مبارك الابن إلي العرش عبر صندوق الانتخاب والدستور وليس بالتوريث
هي دي الصورة الحالية والاستفتاء على التعديل على الأبواب
الخانتين ( نعم / لا ) قدام عيني
: و فعقلي مثل كانت أمي بتقوله دايماً
من طوبة لدبشة يا قلب لا تحزن
تعالوا نحاول نقلب لهم الفخ ده على دماغهم .. ونخليها فضيحة
اللي ماعندوش بطاقة انتخابية يقعد في بيتهم اليوم ده
أما اللي عنده بطاقة انتخابية .. ينزل ويروح لجنته يسحب الاستمارة ويقطعها 100 حتة أو يحرقها لو عرف
أصل المقاطعة النهائية مع الشلة دي ما تنفعش لأنهم ببساطة هـ يملوا الاستمارات – زي كل مرة – ويقولوا أن الناس جت وانتخبت
تعالوا نرفض الطوبة والدبشة ونخلي لعبتهم علينا فضيحة ليهم
المجد للغلابة
وليسقط مبارك وولده

15:00 Posted in الدفتر | Permalink | Comments (0) | Email this

The comments are closed.