« 2005-11 | HomePage | 2006-07 »
31/05/2006
الودان
مش عارف ليه حاسس أني لو كتبت هـ أكون كاتب كويس
وبما أني بأصدق أحاسيسي بشكل كبير ... يبقى لازم أكتب .
وبما أني نويت أكتب يبقى لازم ألاقي موضوع أكتب عنه
ممكن أكتب عن أيه ؟ .. أكتب عن أيه ؟
أه ممكن أكتب عن الودان .. أيوه هي الودان ..
والله العظيم مش تورية ودااااااااااااااااااان
مالها الودان
ده حتى الودان - ولا مؤاخذة - عضو مُهم للشخص مننا
-باعتبارنا شوية أشخاص -
مش مجرد عضو
ده عضو مسئول عن حاسة
- طبعاً السمع -
ودي حاسة مافيش شخص بيوقفها بمزاجه
ولو للحظات
- عمرك سمعت عن حد بيغمض ودانه ؟ -
مسئول كمان - العضو ده - عن الاتزان العام للشخص ..
يعني عضو محتاج - ويستحق - عناية خاصة
ومع ذلك فهو طول الوقت مقلب الحواس
فـ الشخص طول الوقت بيسمع .. سب دين / كلاكسات /
أغاني وحشة / نكت بايخة / مواضيع تافهة /
ألفاظ فوق مستوى خيال سفالته / مصطلحات ضخمة /
كلام مش مفهوم من بابه / ........ ألخ
ومهما أشتكى - ولا مؤاخذة - عضوك ده
بيكون صعب عليك أنك - ولا مؤاخذه - تريحه فوراً
فـ بتحتاج جو ملائم ومكان بيتمتع بقدر كبير ..
من الخصوصية
وقدرة على التحكم في الأصوات الموجودة فيه ..
وكل دي تفاصيل مكلفة .. وأغلب الأشخاص فُقرا
فـ عشان كده دايماً ودان الشخص مننا تعبانة ومش واخدة حقها
مش كده وبس ده أحنا كمان بنشيلها سجاير وأقلام
وهم مشاكل عنينا
عشان كده أعتقد إن مش كتير أن الشخص - اللي هو أنا -
يكتب عنها موضوع ويسعى كمان أنه ....
ينشره عشان يوصل لأكبر عدد ممكن من الأشخاص
بس ياترى ممكن أكتب أيه عن الودان ؟؟؟
00:20 Posted in الدفتر | Permalink | Comments (3) | Email this