« بيان عام وهام وعاجل | HomePage | حريقة في البار لمان »
29/06/2008
الاعتذار لغير الله مذلة
المجد للشيطان معبود الرياح
من قال لا في وجه من قالوا نعم
من علم الإنسان تمزيق العدم
من قال: لا
لم يمت
وظل روحاً أبدية
عبقرية الآلم
(أمل دنقل)
..أما بعد
أرسل السيد أمير صلاح الدين رسالة لكل المشاركين فى جروب بلاك تيما ـ يعتذر فيها عما قلته انا والشاعر ضياء رحمانى من قصائد
كما اعتذر عن سلوك نسبة من الجمهور ، يقول أمير: انهم كانوا يشربون الخمور والمخدرات اثناء الحفل
اذهلتنى الرسالة دى بشدة ، خصوصا توقيت ارسالها -حوالى اربعة صباحاً- كمان اذهلتنى فكرة
اعتذار اى شخص فى العالم عن ما لم يفعله
فالقصائد لها اصحابها ، و قرأوها امام الناس بانفسهم
وتجاوزات الجمهور وان حدثت ، فهى مسئولية الجهة المنظمة للحفل
بعد تجاوزى لحالة الذهول قدرت مدى وجوب الرد على ما اثير
اولا الشعر :طبعا اولا
القيت فى الحفل عدد اتنين قصيدة نثر عامية فيهم تضمينات قرآنية
النص الأول بعنوان : جدى ضمنته اية قرآنية كما هى فى المصحف و وضعتها على اساس كونها اية قرآنية
النص الثاني بعنوان سورة الثورة - القيته بناء على رغبة عدة افراد من الحضور - يتضمن
العديد من الالفاظ القرانية دون التقيد بنص الاية
وانما فقط استخدام الكلمات وما تحمله من مردود تاريخى
والحالتين للاسف لست مستحدثهم
انما هى طريقة كتابة منذ عصر صدر الاسلام
العجيب ان القصيدتين لا يتعرض مضمونهما من قريب او بعيد
للذات الالهية التى يدافع عنها امير بن صلاح الدين
القصيدة الاولى - اذا جاز التعبير - اجتماعية
والثانية ذات طابع سياسى
عزيزى امير بن صلاح الدين
( حر فى استايلات هدومى .. وف ديانتى و وقت نومى )
( انا شيخ فلتان )
( حر انى اسهر بكيفى .. انى اختار نوع وليفى )
سمعتك بتغنى الكلام ده وبعدين قريت اعتذارك الغير مبرر
فبقيت مش عارف
هو انت مش فاهم اللى انت بتغنيه ؟!؟!؟
ولا مافهمتش الشعر اللى قولته فى الحفلة ؟!؟!؟!؟
ولا قررت تزايد علينا و برضه مافهمتش تعمل ده امتى وازاى ؟؟!!؟؟!
ثانيا : انتقاد الجمهور :
برضه مقدرتش افهم اعتذار امير عن مشاكل تنظيمية فى الحفلة
وكمان لو المنظمين شافوا شغلهم كان العدد ده من الجمهور ح يطلع برة المكان
يعمل اللى هو عايزه ويرجع يحضر الحفلة
يبقى هل امير بيعتذر نيابة عن منظمى الحفل
ولا هو ضد تعاطى المواد المخدرة اصلا ؟
وده غريب جدا
لانه سمعته بيغنى ضد خلط الحشيش بالكيميا !! فى اغنية بلاك تيما
كمان هو بيتعامل - فى الشغل - مع العديد من الفنانين والشعراء
من متعاطى هذه المواد وانا احدهم
فى النهاية و بشكل عام
مش قادر احدد - ولغاية دلوقتى - هل امير
بيغازل رقيب ما لا يعرفه غيره ؟!؟!
مش فاهم الكلام اللى بيغنيه ؟!؟!؟!؟
مش فاهم الشعر اللى سمعه ؟!؟!؟!؟
بيتعلم المزايدة جديد ومش عارف يستخدمها ؟!؟!؟!؟
حصلت عليه ضغوط من ادارة الساقية ؟!؟!؟!
وان كنت استبعد الاحتمال الاخير
لانى القيت النصين فى الساقية اكتر من مرة
ومن ضمنهم حفلة لفريق هوجة للموسيقي الشاب عمرو جاهين
وتم تصوير هذا الجزء من قبل التليفزيون المصري
كما أعيد إذاعة هذا الجزء تحديداً عدة مرات لفترة طويلة على قناة النيل الثقافية
في النهاية عندي سؤال هام جداً بالنسبة لي وفي انتظار الإجابة
بأي صفة قدم أمير بن صلاح الدين الاعتذار؟؟؟
هل بشخصه أم بصفته لسان الفريق ككل؟!؟!؟!؟!
21:10 Posted in الدفتر | Permalink | Comments (12) | Email this
Comments
مش كفاية كلام فى الموضوع ده بقى ؟
انا عايز أقول اٍنى ماسمعتش الشعر بتاع رامى ولا قبل الحفلة ولا أثناء اٍلقاءه.... واٍعتذراى كان بسبب الاٍيميلات الكتير اللى جاتلى على جروب بلاك تيما على الفيس بوك ... واللى كانت بتستنكر كلام ضياء وكمان كلام رامى رامى واٍستخدامه للقرآن الكريم ... وقلت اٍن الكلام ده مسئولية الشاعر الشخصية ... مع عظيم اٍحترامى لضياء ورامى يحى وكمان ميدو زهير وشعورى بالفخر لأننا بنشتغل مع بعض .. وربنا يدمها علينا نعمة
زى بالظبط ما بلاك تيما مش مسئولة عن المخدرات وماشابه واٍن ده مسئولية الساقية ... ولكن من حق جمهورنا على الأقل الاٍعتذار ...حتى لو الموضوع مش ف اٍيدينا
واٍستنوا عيد ميلاد بلاك تيما يا بلاك تيماوية الشهر اللى جاى والسلام ختااااااااااااااااااااااام
Posted by: amir | 09/07/2008
where did all the comments by Doaa Mustafa go?
Posted by: mystic dream | 10/07/2008
Does it really matter to you that much???
i asked ramy to delete my entries..
Posted by: Dr.Do2Do2 | 10/07/2008
بشكل مختصر للي ميعرفش القصة
دعاء تشكل جبهة للدفاع عن أمير
Posted by: ساره | 10/07/2008
بالظبط كده يا ساره
جبتي المفيد
Posted by: Dr.Do2Do2 | 10/07/2008
الواحد مخنوق من اللى حصل
مالوش علاقة بالموضوع ميتكلمش
هناك الكثير أشخاص لا يهمها سوى إثبات رأيها ولو بالقوة ، تعارض من أجل المعارضة فقط ، لا يوجد لهم هدف أو قضية معينة ، المهم هو إثبات الرأي
دعاء انسانه طيبه
الف شكر
Posted by: ساره | 10/07/2008
أنا مجرد واحده قالت رأيها في الموضوع ككل
لكن ناس ربنا يهديهم حولوها مجزره في الرد على بعض و كأنهم عاوزين يقولوا إني مجرد باكتب للدفاع عن أمير
مع إن في الأصل أنا كنت باقول وجهة نظري و باشرح أنا ليه اتضايقت من الحفله اللي فاتت عامة مش لمجرد إن شعر رامي أو هجومه على أمير ضايقني
جزاك الله كل خير و ربنا يكرمك :)
Posted by: Dr.Do2Do2 | 10/07/2008
نحب نعرف بلـــوجك
Posted by: ساره | 10/07/2008
لا أنا (الحمد لله) مش ليا في الليله دي يا جميله
كفايه عليا الصيدله
Posted by: Dr.Do2Do2 | 10/07/2008
عندي سؤال هام
دعاء
هل نشأت بينها وبين أمير صداقة قوية وحب برئ وطاهر
Posted by: سلطان | 10/07/2008
هنبدأ نخرف بقى
Posted by: Dr.Do2Do2 | 11/07/2008
علي فكرة الشعر بتاع رامي وضياء الرحمن كان اجمد حاجه في الحفلة
Posted by: محمد عبد الله | 14/07/2008
The comments are closed.