27/03/2007
..لو لم أكن مصرياً
الله يرحم مصطفى كامل
المناضل القديم مؤسس الحزب الوطني
بتاع لو لم اكن مصرياً
لو عاش ليوم 26 مارس2007
وشاف أتوبيسات المصالح الحكومية
وهي بتنقل الموظفين من مكاتبهم للجان الأنتخاب
للتصويت بالعافية على تعديلات الدستور من سيء إلى اسؤ
وشاف جنود الامن المركزي في مصر
بيطاردو أي مواطن يعلن مقاطعته لتمثيلية الأستفتاء
ومحاصرة مقار الأحزاب المعارضة
رغم أنها أحزاب اليفة أصلاً ومتعاونة أحياناً
لو شاف شباب مصر وهمة بيتخطفوا من الشارع في عز الضهر
ويترموا في الصحرا عشان يتربوا ويبطلوا يعترضوا على أي حاجة تاني في حياتهم
لو مصطفى كامل شاف كل ده بيحصل في مصر
في نفس اليوم اللي بيسلم فيه ولد فال قائد الانقلاب العسكري المروتاني
السلطة طواعية إلى الرئيس المنتخب من قبل الشعب المروتاني
في انتخابات لم يرشح فيها ولد فال نفسه
في سابقة هي الأولى من نوعها في الشرق الاوسط
..وقبل أن يترك ولد فال منصبه
مرر قانون جديد وبموافقة المجلس العسكري
يعطي أمتيازات توازي الوزراء لقائد المعارضة
لأنه حصل على نسبة من أصوات الشعب
في مبادرة اعتقد انها عالمية
أكيد لو عم مصطفى كامل حضر اليوم ده
كان عدل مقولته التاريخية وخلاها
لو لم اكن مصرياً لوددت أن أكن موريتانياً
وسلم لي ع الريادة
17:45 Posted in الدفتر | Permalink | Comments (4) | Email this
26/03/2007
الأست فتاء
اليوم هو يوم الأست فتاء
وهو يوم دعوة2للمليطة تحت عنوان أحنا أتنفخنا
ودي صور ليا اثناء ممارستي للمليطة في الطريق العام
16:30 Posted in الدفتر | Permalink | Comments (2) | Email this
25/03/2007
دعوة 2 للمليطة
بمناسبة كتب كتاب الوطن قررت انا صاحب الدفتر صعلوك
ومسؤل العلاقات الخارجية والداخلية والمهلبية لتجمع احنا اتفشخنا المعارض
أن أدعو أهل هذا الوطن في المشاركة في حالة مليطة أحتفالاً بكتب كتب وطننا العزيز
وليكن تاريخ هذه الحالة من المليطة
هو نفس يوم الأستفتاء على الدستور
يوم 26/3/2007 يعني بُكره
وليكن اسم اليوم ده أحنا اتنفخنا
وكل المطلوب في اليوم ده اللي اتمنى أن يشارك فيه عدد كبير من الناس المنفوخة
المطلوب ان كل إنسان يمارس يومه بمنتهى الطبيعية
بس الأختلاف الوحيد أنه يعبر عن مدى ما وقع عليه من نفخ من هذه الشلة الحاكمة
مش بالهتاف او التظاهر او اي وسيلة مواجهة مباشرة مع كائنات الأمن المركزي
أنما بأن كل شخص يشيل معاه عدد من البلالين المنفوخة بالطبع
وعلى قد ما سيادتك منفوخ أنفخ بلالين أمشي بيها في الشارع وبدون أي دوشة غير فرقعة البلالين
خلي العالم كله يعرف قد ايه احنا أتنفخنا
وأبقي خلي كائنات الامن المركزي يبدلوا العصيان والقنابل المسيلة للدموع... بالدبابيس
15:05 Posted in الدفتر | Permalink | Comments (2) | Email this
20/03/2007
مبروك يا شعب...كتبوا كتاب الوطن
أعلنت الحكومة أن يوم 4/4 القادم سوف يتم فيه الاستفتاء على التعديلات الدستورية
قلت مش معقول مناسبة زي دي تعدي من غير ما اكتب موضوع عليها في الدفتر
بس انشغلت النص الاولاني من مارس في الاعياد الحريمي
يوم المراة المصرية واليوم العالمي للمراة وعيد الام
أصلي باحب اشوف أمبراطورية ميم والاتحاد النسائي
والافلام المناسباتية اللي بالك فيها
وقبل حتى ما نوصل لعيد الماما فاجئتني الحكومة أن الاستفتاء أتغير ميعاده
وبقى 26/3 ...يعني كمان اسبوع
يعني الحكومة عدلت الدستور قبل ما أنا أكتب ورقة في الدفتر بتاعي
..مجلسي الشعب والشورى أتناقشوا في الدستور وأتفقوا وخلصوا الموضوع
قبل ما انا أكتب صفحة على الورق
كتاب الوطن اتكتب قبل ما ورقتي تخلص
..فقلت لازم أكتب بسرعة
أعتذر للوطن ولكل شخص بيقرا الدفتر
عن عدم حضوري المناسبة العظيمة دي
وأعرف أي حد في الكوكب العجيب ده
...أنه يوم كتب كتاب الوطن
الشعب ماحضرشي
16:50 Posted in الدفتر | Permalink | Comments (0) | Email this
13/02/2007
ومن الـ.... ما فضح
أولاً وقبل أي حوار أسف على التأخير في كتابة الموضوع ده بس البنكنوت بقى الله يحرقه
..... المهم
للمرة التانية يخاطب نادي النوبة العام الرئيس مبارك باسم كل النوبيين
راجع موضوع مش كل اللي بتهز وسطها بتتنقط
رغم أن عضويته بالكامل لا تصل لتعداد قرية واحدة من قرى النوبة البالغ عددها 44 قرية
ناهيك عن حوالي 75% من أعضائه عضويتهم ورقية
يعني مجرد اسامي في الدفاتر ومايعرفوش ميدان التحرير فين
المهم.. نشرت إدارة النادي الموقرة -من كام شهر-شكر للسيد الرئيس
في الصفحة الاولى من جريدة المساء
في شكل متعارف عليه انه بيكون إعلان مدفوع الاجر
....الكوميدي في الموضوع
إن الإعلان كان رد على تصريح الرئيس بأعطاء الاولوية في تملك أراضي النوبة
ويالا الكرم العجيب... للنوبيين
طيب بلاش اقول أحا عشان القراء الأخلاقيين مايزعلوش
تعالوا نقول كلام تاني أكثر تأدباً وتوضيحاً
أولاً: ده مجرد تصريح
والمعروف في مصر المنحوسة وخصوصاً في الربع قرن المنصرم
أن المسافة بين الوعد والتنفيذ = المسافة من بكين إلى واشنطن مضروبه في 52
ثانياً: أعتقد ان هناك فرق كبير
..بين الوعد بإعطاء الاولوية في تمليك الاراضي
وبين أصدار قرار ببدأ المشروع القومي لإعادة توطين النوبيين في اراضيهم
ويبقى المشروع تحت رعاية السيدة الفاضلة سوزان مبارك
وفلوس الفاو تطلع وكلها ترزق.. مافيش مانع... قشطة يعني
يأخي أعتبرونا أطفال أو نسوان أو حتى درن أو حتى ساوونا بختان الإناث
ولا لازم أطلع في التلفزيون اقول انا اقرع وأسود ومتهجر وعاوز جنيه؟
ثالثاً: يا سيادة إدارة النادي المبجلة
على فرض ان ليكم الحق في الكلام باسم كل ابناء النوبة وتوجيه الشكر نيابة عننا
كان من باب اولى أشكروا الناس اللي اثارت القضية
وجريوا في كل مكان قدروا يوصلوا له لغاية ما بدءوا يحرجوا الشلة الحاكمة
وخلوها تاخد رد الفعل البسيط ده
الناس اللي أتُهموا بعدم الولاء لوطنهم عشان بيدافعوا عن حقوقنا كلنا
واحد زي حجاج ادول اللي دار يصرخ ويفضح النظام في كل منبر يقدر يوصل له
في مغامرة بكل تاريخه ومكاسبه الشخصية المحدودة
وبنوتة جريئة زي سمر نور اللي غامرة هي كمان بس بمستقبلها
لما نشرت فضيحة المليار وال350مليون بتوع الفاو المخصصين لإعادة توطين النوبيين وإعمار النوبة
وأكيد في ناس تانية أنا ما اعرفهاش شقيت وخاطرت في سبيل حقوقنا المهدورة عمداً
ده حتى ماهر حبوب -مع أحترامي الفائق ليه- اللي ما اعرفش عن دوره غير نشره للأحداث والمقالات... الخ إلى اكبر عدد ممكن من الناس
أولى بالشكر ألف مرة من مبارك اللي اصدر وعد هزيل يقدر يتراجع عنه زي وعوده الكتير
لكل الشعب المصري بدون مايكلف نفسه عناء الأعتذار او حتى التبرير
وسلم لي على الأنتخابات والحزب الوطني وعرايس الماريونت وأكلي الفتافيت
19:45 Posted in الدفتر | Permalink | Comments (2) | Email this